قصيدة / يا بنتها شعر / اشرف صديق

يا بنتها
ياللى ف ملامحك زيّها
كان المقدّر ابقى ابوكى وقلبى يصبح عشّها
يا بنتها
ياللى فجمالك حُسنها
مين اللى قالك ان مامتك
فى الحُسن اُبدع زيّها
كام مرّة عنى اتكلمت
وان جيت فى بالها اتبسمت
وان مرّ طيفى فى المكان
شفتى ف عنيها حنين زمان
و قالت لك انى عشقتها
يا بنتها
زى الملايكه ف حبّها
لما تغنى الدنيا تعزف لحنها
و فوق جيبنها الكون بيرسم فرحها
ويهل من ضفايرها القمر
والشمس تشّرق من عنيها وقلبها
يا بنتها
مين اللى قال لك ان مامتك
زىّ الملايكه ف حُبها
هى الملايكه تعرف تحبك حُبها
ولا الملايكه ف العشق تعشق عشقها
يا بنتها ياللى ف جمالك حُسنها
كان المقدر ابقى ابوكى وقلبى يصبح عشّها