قصيدة ( حاجة احلى ) الشاعرة السكندرية / وفاء بغدادى

النهاردة ماما جتنى فى المنام
لبستنى من أديها جهاز جديد……من غير حديد
كل مسمار كان بيجرح
مطرحه حطت حمام
طرت بيهم للسما وطلعت فوق
شفت حزنى تحت خالص
مش حيطلع فوق معايا
والدموع اللى ملتنى
كلهم ….
أتحولوا شمع وهدايا
فوق جميل
الفرح من غبر ما تدفع
والخيال أسمى وأوقع
لحظة يتحول حقيقة
يبقى عندى من الملايكة
صحاب كتير
بنات كتير
نلعب سوا
نضحك سوا
واما نتعب راح ننام
ياااااه نسيت
التعب محض افترا
لفظ ساقط م الكلام

ديسمبر ٢٠١٥

ديوان البنت إللى بتشوف الملايكة