آن الأوان نفتح جميع الدفاتر لسانى جمر .. وكلامى فاتر . ليه فى البدايه عملتى خوفك ساتر ؟ وحبتينى وراه !! وحبتينى معاه !! قلبك لا هو أميرى ولا انا مولاه . الحب نقطة مطر تنزل فى قلب الخطر تنده خضار البشر تطرح قلوبهم شجر ترد روح المسافر العمر ماشى وانا ف دكانة الأرواح قلبى نشارة خشب تترش فى الأفراح بيها عيون تشقى.. وبيها جيوب ترتاح فى بردعه لحمار سانن لسانه على حجر صوته: من إمتى كنتوا بتعرفوا تعيشوا ؟ ولاحتى كنتوا بتعرفوا تموتوا؟ من سكتى فوتوا ......... مشيت فى كونى فوقى نخيل لا وقع لى بلحه ولا طولونى . إدونى قايمة تعليمات لحكيم رماها ف أول السكه ومجاشى واما سألنا عنه غنوا لنا (طار فى الهوا شاشى) أولها إنى أتحد بجنونى وآخرها صوتى جوه تانية بنطلونى حسب المقام مسموح أقول وحكمتى أصبر تنول وغنيا آخره يبقى صول ومشايخى لما اكفر يادوب يتوبونى . فى قطر من غير تذكره متجمعين نهتف يوماتى بصوت يشق الحنجره عشقك ضيا العين إنما ( ماعرفش أدق الكسبره) ......................... سامحينى ياحبى يا حب متخبى لابد ورا ساتر أنا قلبى مش ساكت عايش وبيعافر مافيش دموع بالمقاوله ولاحب بعد المداوله الحب حاكم ودوله دخولها مش بالتذاكر .
